Հովսեփյան Ռուբեն Գեորգիի

Հովսեփյան Ռուբեն Գեորգիի
Овсепян Рубен Георгевич
Անգլերեն:	Hovsepyan Ruben
Հայերեն:	Հովսեփյան Ռուբեն Գեորգիի
Ծննդյան տարեթիվը:	05.05.1939
Ծննդավայրը:	Երևան, Հայաստանի Հանրապետություն
Համառոտ տվյալներ: Գրող, թարգմանիչ, կինոդրամատուրգ:

Կենսագրություն

Ծնվել է 1939թ. մայիսի 5-ին Հայաստանի Հանրապետության մայրաքաղաք Երևանում:

Կրթություն

• 1956թ. ավարտել է Հոկտեմբերյան քաղաքի թիվ 1 միջնակարգ դպրոցը:
• 1962թ. ավարտել է ԵՊՀ երկրաբանության ֆակուլտետը:
• 1974-1975թթ. սովորել է Մոսկվայի բարձրագույն սցենարական դասընթացներում:

Աշխատանքային գործունեություն

• 1956-1957թթ. աշխատել է Հոկտեմբերյանի հաստոցաշինական գործարանում:
• 1962-1964թթ.՝ որպես երկրաբան աշխատել է Թուրքմենիայի Կարակումի անապատում:
• 1965-1966թթ. եղել է «Ավանգարդ» թերթի արվեստի և գրականության բաժնի վարիչը:
• 1966-1969թթ.` «Գրական թերթի» շրջիկ թղթակիցը:
• 1970-1974թթ.` «Սովետական գրականություն» ամսագրի արձակի բաժնի վարիչը:
• 1975-1976թթ. աշխատել է ՀԽՍՀ Նախարարների խորհրդի հեռուստատեսության և ռադիոհաղորդումների պետական կոմիտեում որպես երիտասարդական հաղորդումների գլխավոր խմբագիր:
• 1976-1979թթ.` «Եթերում է Երևանը» թերթի խմբագրությունում:
• 1980-1981թթ. աշխատել է «Սովետական գրականություն» ամսագրում որպես գրական-գեղարվեստական գրականության բաժնի վարիչ:
• 1981-1982թթ. եղել է «Սովետական գրող» հրատարակչության գեղարվեստական գրականության (ժամանակակից արձակ և պոեզիա) խմբագրության վարիչ:
• 1982-1987թթ.՝ «Սովետական գրող» (այժմ՝ «Նաիրի») հրատարակչության գլխավոր խմբագիր:
• 1988-1989թթ.՝ ՀԳՄ քարտուղար:
• 1988թ.՝ ՀՀ ԱԺ պատգամավոր:
• 1989թ.-ից՝ «Նորք» ամսագրի գլխավոր խմբագիր:

Ձեռքբերումներ

• 1980թ.՝ ՀԳՄ Դ. Դեմիրճյանի անվան մրցանակ:
• 2007թ.՝ ՀՀ Նախագահի մրցանակ:

Այլ

• 1973թ. նկարահանվել է «Հնձան» ստեղծագործության հիման վրա կինոնկար:
• 1983թ. նկարահանվել է «Ամենատաք երկիրը» ֆիլմը:
• Լույս է ընծայել պատմվածքների և վիպակների ժողովածուների:
• Կատարել է թարգմանություններ: Թարգմանել է Լև Տոլստոյի ստեղծագործություններից, Գ.Գ. Մարկեսի «Հարյուր տարվա մենությունը»։

Համեմատության դրսևորումները Ռուբեն Հովսեփյանի արձակում

• Գեղարվեստական ոճի հիմնական հատկանիշը խոսքի պատկերավորությունն է, հուզականությունը և արտահայտչականությունը, որոնք ստեղծվում են լեզվի պատկերավորության, արտահայտչական բազմաթիվ միջոցներով ու ոճական հնարանքներով։ Պատկերավորման միջոցներից է համեմատությունը։ Համեմատության ճիշտ կառուցումը պայմանավորված է գրողի գեղարվեստական մտածողությամբ, կախված է նրա դիտողականությունից, արտաքին առարկաների ու երևույթների միջև եղած կապերն ու ընդհանրությունները տեսնելու, դրանք բանաստեղծորեն ընկալելու և զգալու ունակությունից։
• 1. Համեմատությունը սովորաբար բաղկացած է լինում երեք անդամից՝ այն առարկան, որը համեմատվում է, այն առարկան, որի հետ համեմատվում է և այն հատկանիշը, որի հիման վրա կատարվում է համեմատությունը։ Ռուբեն Հովսեփյանի արձակում եռանդամ համեմատությունները զգալի թիվ են կազմում։ Օրինակ՝ Առաջնորդը փոքր-ինչ բացեց գիրկը և տեսավ, որ չորացած աղվամազը որդու վրա բուսել-ցցվել է գարնան ծիլերի պես։ Այստեղ առկա է համեմատության երեք անդամներն էլ. չորացած աղվամազը համեմատվում է գարնան ծիլերի հետ, որոնց միավորում է բուսել-ցցվելու ընդհանուր հատկանիշը։
• 2. Երբեմն համեմատության մեջ բացակայում է այն հատկանիշը, որի հիման վրա կատարվում է համեմատությունը։ Օրինակ՝ Մինչ տղմոտ հատակ հասնելը նա սուզվեց քարի պես և ոչ քնած էր, ոչ արթուն։ Բերված օրինակում առկա են համեմատվող առարկաները, բայց բացակայում է այն հատկանիշը, որի հիման վրա կատարվել է համեմատությունը (քարի պես՝ ուժգին իմաստով)։
• 3. Համեմատությունները լինում են հաստատական և ժխտական։ Դրանք երբեմն հանդես են գալիս նույն համատեքստում միաժամանակ, որով ավելի է ընդգծվում պատկերավորությունը։ ա) Հաստատական համեմատություններ. Հովսեփյանի արձակը հարուստ է հաստատական համեմատությունների օրինակներով։ Օրինակ՝ Պաշտպանության նախարարը, խռոված երեխայի նման, դուրս գալ էր ցանկանում։ Նրանց նստատեղերով թաղեցիներն իմանում էին օրվա ժամը։ բ) Ժխտական համեմատություններ. օրինակ՝ Խմիկ Խաթունը աստված չէր, որ ջուր ստեղծեր ու հիանար ստեղծածով։ Այստեղ Խմիկ Խաթունը համեմատվում է աստծո հետ, և միաժամանակ ժխտվում է նրա աստված լինելը։ գ) Հաստատական – ժխտական տիպի համեմատություններ. օրինակ՝ Այնպես էլ խոշորն էր, այնպես ախորժելի, ասես տանձ չէր, այլ ծորուն մեղր։
• 4. Համեմատությունը կարող է լինել նաև հեգնական, երբ հարցական բնութի հաստատական նախադասությունը իրականում ենթադրվում է որպես ժխտական նախադասություն։ Օրինակ՝ Դու տղամարդ ե՞ս, դու կապած աղվես ես։ Մի տանիքն ի՞նչ է, որ մարդավարի չես ծեփում և այլն։ Իրականում խոսողն ուզում է ասել՝ դու տղամարդ չես։
• 5. Ռ.Հովսեփյանի ստեղծագործություններում կան այնպիսի կառույցներ, երբ միևնույն նախադասության մեջ միաժամանակ գոյություն ունի և' համեմատություն, և' փոխաբերություն։ Օրինակ՝ Հառաչում է լիճը անզավակ մոր նման։ Լիճը համեմատվում է անզավակ մոր հետ՝ հմմտ. և հառաչող լիճ՝ փխբ.։ Առավոտից իրիկուն չորուկ-չորուկ կոճղերի նման նստոտում էին (նրանք) մեր տան պատի տակ։ Շղթան պոկվել էր կեսից, մնացած կեսը օձի նման վազում էր շան ետևից։ Անտառն էլ խաղաղ չէ. Երբ սխալ հաշվարկված արկեր են ընկնում, անտառը թշշում է կրակ կուլ տված ծովի պես։ Ամփոփելով՝ նկատենք, որ Ռուբեն Հովսեփյանի խոսքը դիպուկ է, պարզ, միևնույն ժամանակ խորը։ Նրա արձակում բավականին շատ են համեմատությունները՝ իրենց ուրույն ոճական կիրառություններով և տարատեսակներով։ Առավել շատ են հանդիպում հաստատական, երկանդամ և եռանդամ համեմատությունները մյուս տեսակների համեմատ:

Նկարներ

• Պատկերիկի ստեղծման սխալ. Նման նիշք չկա
• 
• 

Մատենագիտություն

• Հովսեփյան Ռ. Գ., Որոնումներ, 1965:
• Հովսեփյան Ռ. Գ., Երկու վիպակ: Ճիչ: Հայոց թաղ, 1970:
• Հովսեփյան Ռ. Գ., Հնձան, 1972:
• Հովսեփյան Ռ. Գ., Ամենատաք երկիրը, 1977:
• Հովսեփյան Ռ. Գ., Երկար, հրաշալի օր, 1980:
• Հովսեփյան Ռ. Գ., Ճայերը, 1980:
• Հովսեփյան Ռ. Գ., Ընտիր երկեր, Երևան, 1987։

Տե՛ս նաև

• Ով ով է.հայեր(կենսագրական հանրագիտարան:Երկու հատորով),ՀՀ խմբ. հանձնաժողով՝ Հ. Մ. Այվազյան (գլխ. խմբագիր) և ուրիշներ,Երևան,Հայկական հանրագիտարան հրատ.,Հ.1,Աբալյան-Ղուշչյան,2005:
• Մեծերը՝ մեր կողքին․ Ռուբեն Հովսեփյանը 75 տարեկան է:
• Ռուբեն Հովսեփյան – Առայժմ պղտոր է մեր տակառի լուծույթը: