Հովհաննես Ջուղայեցի Քթռեշենց

Հովհաննես Ջուղայեցի Քթռեշենց
Оганес Джугаеци Крнеци
Անգլերեն:	Hovhannes Jughayeci
Հայերեն:	Հովհաննես Ջուղայեցի Քթռեշենց
Ծննդյան տարեթիվը:	1610
Ծննդավայրը:	Նոր Ջուղա, Իրան
Մահվան տարեթիվը:	1660
Համառոտ տվյալներ: Տպագրիչ, մշակութային գործիչ։

Կենսագրություն

Ծնվել է մոտ 1610-ական թթ. Իրանի Սպահան քաղաքի Նոր Ջուղա թաղամասում:

Մահացել է 1660-ական թթ.:

Կրթություն

• Սովորել է Նոր Ջուղայի Ամենափրկիչ վանքի դպրոցում, աշակերտել Խաչատուր Կեսարացուն։

Աշխատանքային գործունեություն

• Աշխատել է վերջինիս՝ 1636թ. հիմնադրած տպարանում, մասնակցել Նոր Ջուղայում լույս տեսած առաջին հայերեն գրքերի՝ Սաղմոսարանի (1638) և «Հարանց վանքի» (1641) տպագրությանը։
• 1660-ական թթ․ 2-րդ կեսին ձեռնադրվել է եպիսկոպոս և նշանակվել Ջուղայի առաջնորդ, որտեղ և նահատակվել է մի հայ աղջկա փրկելիս։

Այլ

• 1639թ. Խաչատուր Կեսարացին նրան ուղարկել է Իտալիա։
• Հռոմի վարպետներին նա պատրաստել է տվել հայերեն տպատառեր, պատկերների տպատախտակներ, ձեռք բերել տպագրական սարքեր և Լիվոռնոյում 1644թ. լույս ընծայել Սաղմոսարան։
• Տպարանը տեղափոխել է Նոր Ջուղա, որտեղ 1647թ. տպագրել է «Պարզատումար» (նորջուղայեցիների և հնդկահայերի օգտագործած տոմարացույցը)։
• Տեղեկություններ կան, որ առաջինն է սկսել տպագրել Աստվածաշունչը, որը, սակայն, անավարտ է մնացել։
• Նրա տպատառերի և տպատախտակների մի մասը պահպանվել է (գտնվում են Նոր Ջուղայի հայկական թանգարանում)։

Տե՛ս նաև

• Ով ով է.հայեր(կենսագրական հանրագիտարան:Երկու հատորով),ՀՀ խմբ. հանձնաժողով՝ Հ. Մ. Այվազյան (գլխ. խմբագիր) և ուրիշներ,Երևան,Հայկական հանրագիտարան հրատ.,Հ.1,Աբալյան-Ղուշչյան,2005:
• Բանասիրության հանրագիտարան